Wanhu wa Isilaeli wangudumigwa kwa kujifugamila jimalukolo
1Waisilaeli nawali kota mzabibu unojile lukami,
ulingulavya mafuza gake.
Mafuza gake vyogalutilile konjezeka,
ndo vyowalutilile kizenjela honhu ha kulavila nhambiko kwa chiwalo cha milungu.
Isi vyoilutilile kudedemka,
ndo vyowalutilile kunoliga mizengo jawo ja kufugamila.
2Mnhumbula za hewo nammema uhadi,
lelo wangulapigwa wahole nongwa ya hewo.
Mkulu Nguluwi kobomola honhu ha kulavila nhambiko ha hewo
na kujiwifya mizengo ja hewo ja kufugamila.
3Hamba wolonga,
“Twahela kahi mndewa,
kwa vila hatumdumbile Mkulu Nguluwi.
Ila hanga twahawele na mndewa yahatuditile choni?”
4Chowalingulonga ndo ulonzi hela,
wangilaha na kikundiza kwa udesi,
hachi haiwele hachi kahi,
yanguzuka kota misolo ja dunga kuli mgunda.
5Wenyeng'haye wa Samaliya wokakama
kwa chiwalo cha limalukolo lya ilogota lya ako Beti-aveni.
Wanhu wake wolilombochezela alyo limalukolo lya ilogota,
mbaka watambika walingulifugamila wolila kwa chiwalo cha limalukolo alyo,
kwa vila lutogo lwa ilogota alyo nalulavigwa.
6Limalukolo alyo lyohilikwa Ashulu, kota kodi kwa mndewa mkulu.
Wanhu wa Isilaeli wobasigwa soni,
Waisilaeli wolyonela soni limalukolo lya hewo.
7Mndewa wa Samaliya koholigwa kota chihande cha nhagala ndodo ya igodi kuli lwanda.
8Honhu ha kufugamila kuli Aveni, howifigwa
kwa vila ndo gehile ga Isilaeli.
Miwa na misolo vyokula na kugubika honhu ha kulavila nhambiko ha hewo.
Nawo wovilonjela vidunda, “Mtugubiche”
na vidunda vidodo, “Mtugwile.”
Wanhu wa Isilaeli wobeta chowanyalile
9Hemwe Waisilaeli, namdita gehile kulawa kula Gibeya,
mng'hali mlutilila kahi.
Ndikomya, ngondo yowadumya wehile kuko Gibeya.
10Mhela wondiuganile ndowagaza,
wanhu wa isi zinji wochikungajiza kwa chiwalo cha hemwe,
leka wawawiche mchinweng'ho,
kwa chiwalo cha gehile ga hemwe menji.
11Isilaeli ndo ilogota idala, lilangusigwe goya,
liwele lyanguganaga kupulula nyhule,
lelo ndoliwoha ngwamo kuli singo yake inojile.
Ndomwendesa Isilaeli,
Yuda yangumlapa yalime, kwa ihuka heye yuye,
ena, Yakobo kolima kwa ihuka.
12Mnyale kutanganika kwa chiwalo cha hemwe,
namwe mobeta igano lya kwimilila,
mlime migunda ja hemwe, kwa vila mhela wa kumhala heni Mkulu Nguluwi naufika,
nani ndowegalila hemwe kutanganika.
13Ila hemwe namlima na kunyala wihe, nambeta kubunza,
namulya mafuza ga uhadi wa hemwe.
Hegwe Isilaeli nakitumbila mong'ho wa gwegwe baho
na winji wa wamizi wa hegwe.
14Ahi ndo ngondo vyoikwinuka hali wanhu wa hegwe,
ngome za hegwe zeng'ha zowifigwa,
kota Shalimani vyoyaiwifile Beti-alibeli kuli zuwa lila lya ngondo.
Mhela wadala wamwenga na wana wa hewo vyowatozigwe kwa mong'ho kuli misanga.
15Ahyo ndo vyoiwa kwa hemwe wanhu wa Beteli,
kwa chiwalo cha ukulu wa wihe wa hemwe.
Zuwa alyo holifika, mndewa wa Isilaeli kodumigwa ng'hatu.