Igano lya Nguluwi kwa wanhu wa Isilaeli
1“Waisilaeli vyowawele wana, nandiwagana,
kulawa Misili nandiwachema wana wa heni.
2Ila vyondutilile kuwachema Waisilaeli,
ndo vyowalutilile kuluta kutali na heni.
Nawalavya nhambiko kwa Mabaali
na kujifunyizila ubani jimalukolo ja milungu.
3Heni ndo ndiwalanguse wanhu wa Isilaeli kujenda,
nene baha nandiwabata moko, ila hawavizelele,
kota heni ndo ndiwosele utamwa.
4Nandiwalongoza kwa ng'weso za isungu
ena, kwa ng'weso za igano,
nambusa ngwamo msingo mwa hewo,
heni nandinamiza na kuwalisa.
5“Lelo, wohiluka kuli isi ya Misili,
wolongozwa na mndewa wa Ashulu,
kwa vila nawalema kunyhiluchila.
6Ipanga lyowa kuli miji ja hewo,
lyowifya mhajilo za lwizi lwa hewo
na kulemeza kiwika goya kwa hewo.
7Wanhu wa heni nawamula kundeka,
hanga wochemigwa na Nguluwi Yawele Kuchanya,
haduhu ne yumwe yoweza kuwenula.
8Gwa Isilaeli, ndoweza ndaze kukuleka?
Ndoweza ndaze kukutoza, gwa Isilaeli?
Ndoweza ndaze kukuditila kota muji wa Adima?
Ndoweza ndaze kukudita kota muji wa Seboimu?
Nhumbula ya heni naigaluka, isungu lya heni nalilutilila kuzuka.
9Ndoilemeza ng'halazi ya heni ing'ang'ale, siwadumya kahi wanhu wa Isilaeli,
kwa vila heni ndo Nguluwi, siwele munhu.
Heni ndo yelile hali hemwe,
nani sikuya na ng'halazi.
10Womhala heni Mkulu Nguluwi ndilingubuma kota isimba,
hondibuma wokuya kwa heni kulawa kolizinjilaga isanya kuno wokakama.
11Heni Mkulu Nguluwi ndangulonga kota,
wokuya kulawa Misili wokakama kota videje,
woguluka kulawa Ashulu kota ng'hunda,
nani ndowahilula kuli ng'handa za hewo.”
Gehile ga Isilaeli
12Wanhu wa Isilaeli wangunzunguluta kwa ulonzi wa hewo wa udesi na uhadi.
Wanhu wa Yuda wang'hali wojendajenda na Nguluwi,
wang'hali wa kukundigwa kwa Yawele Yelile.