1Wanhu wa Isilaeli wangudita upoka kwa kuibilimisa mbeho ya kolilawilaga isanya nemisi yeng'ha,
na kuwa na udesi na kilewa ng'hatu.
Wangudita ilagano na wanhu wa Ashulu,
na kulajiza mafuta ga mzeituni kulawa Misili.
2Mkulu Nguluwi kangung'ung'uta kuwala Yuda,
komgaza Yakobo kwa kiwhana na nzila za heye
na kumhilusila kwa kiwhana na madito ga heye.
3Yakobo vyoyawele mmunda nakebata chisigino cha mkulugwe,
kota munhu, naketwanza na Nguluwi.
4Naketwanza na mhilisi na kumsumya,
nakalila na kudedeza kupegwa uganililo wa heye.
Nakamfika ako Beteli na kulongasa naye.
5Mkulu Nguluwi Yawele na Mong'ho,
Mkulu Nguluwi ndo itagwa lya heye!
6Ila yangukugana uhiluche kwa Nguluwi wa hegwe,
wibatilile igano lya kwimilila na hachi
na umbeteze Nguluwi wa hegwe mazuwa gose.
7Yalinguguza vinhu kangutumiyaga vipimilo vya uhadi,
kanguganaga kuwabunza wanhu.
8Wanhu wa Isilaeli wangitogolaga wolonga,
“Hetwe tuna lufufu ng'hatu, natidita tuwe na lufufu.
Hamwe na lufufu lwa hetwe lweng'ha, hawofika mgati mwa hetwe nongwa yoneche ama gehile.”
9Mkulu Nguluwi kangulonga,
“Heni ndo Mkulu Nguluwi, Nguluwi wa hemwe,
heni ndo ndiwalavile kuli isi ya Misili!
Heni ndowadita mikale kahi kuli mihema,
kota vila kuli mazuwa ga mnvina za hemwe ziwichigwe.
10Nandonga na waloli, nandiwapa uloli winji
na kulonga kwa nhelo kukolela hewo.”
11Ndaze, Gileadi hawele mwihe?
Wanhu wa heye hambe watanze chinhu!
Ndaze, hawalingulavya nhambiko za mibuguma ako Giligali?
Honhu ha kulavila nhambiko za hewo,
howa kota vilundo vya maganga kuli mgunda ulimigwe.
12Yakobo nakabilimila kuli isi ya Alamu,
nakakola mijito leka yapegwe mche,
nakadima ming'holo kwa chiwalo cha kupegwa mche.
13Mkulu Nguluwi nakamlajiza mloli kumlavya Isilaeli kulawa Misili,
kwa nzila ya mloli nakamlolela.
14Wanhu wa Isilaeli nawamzudiza ng'hatu Mkulu Nguluwi,
ila Mkulu Nguluwi kowahilulila chibida, kwa nongwa ya hewo ya kubohola danda,
kowagaza kwa mbuli zihile zowaditile.