1Muwacheme wakalumbu wa hemwe, “Wanhu wa heni,” kahi muwacheme lumbu wa hemwe, “Waganwa wa heni.”
Ung'hondwa na magazo ga Isilaeli
2Mumdedeze mamo wa hemwe, mumdedeze,
kwa vila heye hawele mche wa heni,
nani siwele mlume wa heye.
Yalavye isisila lya ung'hondwa kumeho kwa heye
na yaleche ng'hatu ung'hondwa.
3Wone haiwele ayo ndomvula nguwo yawe mwanzi
na kumleka ne nguwo kota zuwa lila loyapondigwe.
Ndomdita kota chiwala,
ndomgalamula yawe isi ya ng'halu
nani ndomkopola kwa ng'halu.
4Silajila igano lya heni kwa wana wa heye,
kwa vila ndo wana wa ung'hondwa.
5Mayawo nakadita ung'hondwa,
yoyaholile himila nakadita mbuli za kubasa soni.
Gomeli nakalonga,
“Ndowalutila wala ndiwaganile heni,
wawele wangumhaga heni chilyo cha heni na mazi ga heni,
sufu ya heni na kitani ya heni, mafuta ga heni na chakunwa cha heni.”
6Lelo, ndoidinya nzila ya heye kwa miwa,
ndomzenjela lukanzi leka yaleche kuwa na nzila.
7Gomeli kowawinza wala yawaganile, ila howafika,
ena, kowapala, ila howona.
Hamba kolonga, “Ndohiluka kwa mlume wa heni wa mwaluko,
kwa vila aho mwaluko nandali goya ng'hatu kusinda sambi.”
8Isilaeli nayali havizelele kota heni ndo ndimpele nyhule na divai na mafuta,
ndimpele sendi na zahabu kwa winji, ziwele nakamgalila mlungu Baali.
9Lelo, mhela wa mbeta ndozihola nyhule za heni,
ndoilavya divai ya heni inyale.
Ndomsukula nguwo za heni za sufu na kitani,
ziwele nazali kwa chiwalo cha kugubika umwanzi wa heye.
10Lelo ndomvula yawe mwanzi hali wala yawaganile,
haduhu munhu yoneche yoweza kumlohola kulawa mmoko mwa heni.
11Ndokudumya kusangalala na kuseka kwa heye kweng'ha,
viwele ndo mnvina za heye za mwaka,
na mnvina za kulawa kwa nyelezi,
na mazuwa ga heye ga zuwa lya Kwesela,
na mnvina za heye zeng'ha ziwichigwe.
12Ndojiwifya mizabibu ja heye na mitini ja heye,
jiwele nakalonga nakapegwa heye kulawa kwa yawaganile,
ndojidita jiwe chisosolo,
migongolo ja kisolo jojidita jiwe chilyo.
13Ndomgaza kwa chiwalo cha mazuwa
goyawafunyizile ubani Mabaali,
loyajinolije kwa pete
na kwa maganga ga sendi nyinji
na kuwalutila yawaganile heye,
ila heni nakasemwa, heni Mkulu Nguluwi ndangulonga.
Igano lya Mkulu Nguluwi kwa wanhu wa heye
14Lelo, ndomdita yanyhulichize
ndomlongoza mbaka kuchiwala
na kulongasa naye kwa uliholile.
15Ako ndomhilulila migunda ja heye ja mizabibu,
ibindi lya Akoli2:15 Akoli Kwa Chiebulaniya ndo ibindi lya magazo. ndolidita liwe lwizi lwa kitumbila.
Kombinza kwa kugana heye kota vyoyawele mhinza,
kota mhela vyoyalawile kuli isi ya Misili.
16Heni Mkulu Nguluwi ndangulonga hino, “Zuwa alyo, hegwe
konyhema ‘Mlume wa heni,’ hunyhema kahi ‘Mkulu wa heni.’ ”
17Kwa vila ndokusa matagwa ga Baali kuli mlomo wa heye,
holanda kahi kwa matagwa ga milungu ajo.
18Ndodita ilagano kwa chiwalo cha hewo,
na migongolo ja kisolo na videje
na vilumbigwe vilingutambala kuli misanga, vileche kukulumiza.
Ndodumya upinde na ipanga na vinhu vya kitowela ngondo hali isi,
leka wikale kwa kikala goya.
19Ndokudita uwe mche wa heni mazuwa gose,
ndokuhesa kwa kutanganika na hachi,
kwa igano lya kwimilila na isungu.
20Ena ndokuhesa kwa kukundigwa,
nagwe konzela heni Mkulu Nguluwi.
21“Kuli zuwa alyo, heni Mkulu Nguluwi ndangulonga,
ndogakunda maya ga ulanga ga kutowa kwa nhonya,
ulanga nawo wokunda maya ga misanga.
22Misanga najo jokunda maya ga nyhule na divai na mafuta,
navyo vyokweneza kugana kwa Yesileeli.
23Ndomnyala Yesileeli kuli isi kwa chiwalo cha nene baha,
nani ndolajila igano lya heni kwa heye,
yula yawele nandimchema, ‘Hauwele mganwa wa heni.’
Yula ndimchemile, ‘Hegwe hauwele munhu wa heni,’
ndomlonjela, ‘Hegwe ndo munhu wa heni,’
naye kolonga, ‘Hegwe ndo Nguluwi wa heni.’ ”