Nguluwi kanguwalonjeleza wanhu wa Isilaeli
1Mhulichize ulonzi wa Mkulu Nguluwi, hemwe Waisilaeli,
kwa vila Mkulu Nguluwi kanguwang'ung'utila wanhu walingikala kuli isi ayi.
“Haduhu kahi kukundigwa ne igano lya kwimilila kuli isi,
haduhu yalingumzela Nguluwi kuli isi ayi.
2Hana kupanjila na uhadi na kukopola yeka,
uhizi na ung'hondwa,
ne kuwa na kuduma,
na kubohola danda kwa kulutilila.
3Ahyo isi yeng'ha naikala,
weng'ha walingikala amo wanguwa ng'hochele
hamwe na migongolo ja kisolo na videje,
mbaka somba za mbahali zangudumigwa.
Nguluwi kanguwang'ung'utila watambika
4“Ila wanhu waleche kulonjelezwa ne kumlonjeleza yunji,
kwa vila heni ndangukulonjeleza hegwe mtambika.
5Hegwe kwangikwang'hwalaga nemisi,
naye mloli wa udesi kangikwang'hwalaga hamwe na hegwe nechilo.
Ahyo, ndomdumya mayako, yawele ndo Isilaeli.
6Wanhu wa heni wangudumigwa kwa vila wahela uwanzi.
“Kwa vila hegwe nakuulema uwanzi,
nani nandikulema kuwa mtambika wa heni,
kwa vila nakugasemwa malajizo ga Nguluwi wa hegwe,
nani kahi ndowasemwa wana wa hegwe.
7Vila watambika vyowonjezeche,
ndo weng'ha vyowalutilile kudita gehile hali heni.
Lelo, ndoludita lutogo lwa hewo luwe chinhu cha soni.
8Wangigutiza kwa ndolendole za wanhu wa heni wawele na gehile,
wana maya ng'hatu ga kuwona nawadita gehile.
9Magazo gawele gowafika wanhu, ndo gowafika watambika kahi.
Ndowatowa kwa chiwalo cha gowalingudita,
ndowahilulila kwa madito ga hewo wawo.
10Wolya, ila hawochiguta,
wodita ung'hondwa, ila hawoponda wana,
kwa vila nawandeka heni Mkulu Nguluwi,
na kujiwinza milungu kota wang'hondwa.
Nguluwi kangukupanjila kufugamila milungu
11“Divai inyale na ya katali,
vyangusa uwanzi.
12Wanhu wa heni wanguganaga utanzi kulawa kuli jimalukolo,
ngoda ya hewo ya ulaguzi ndo yanguwapaga ulonzi.
Muhe wa ung'hondwa nauwadita hewo wajilile,
nawadita ung'hondwa kwa kujifugamila milungu jinji,
nawandeka heni Nguluwi wa hewo.
13Wangulavya nhambiko kuli vinhembenhembe vya vidunda,
ena, wangulavya nhambiko kuli vidunda,
hasi ha migodi ja miyaloni na migodi ja migude na migodi ja ukwaju,
kwa vila lubehelo lwa migodi ajo ndo lunoga.
Ahyo wahinza wa hemwe wanguditaga ung'hondwa,
na wache wa wana wa hemwe wanguditaga ung'hondwa.
14“Ila siwatowa wahinza wa hemwe howowa wodita ung'hondwa,
ne wache wa wana wa hemwe howodita ung'hondwa,
kwa vila walume hewo wawo ndo walingulutasa na wang'hondwa,
na kulavya nhambiko hamwe na hewo hali milungu kota wang'hondwa.
Wanhu awa walihela kuvizela, ndikomya wodumigwa!
15“Ndikomya, hemwe Waisilaeli mwa wang'hondwa,
ila, mleche kuwadita wanhu wa Yuda wawe na nongwa!
Mleche kuluta honhu helile ako Giligali,
ne kuluta kula Beti-aveni,
ne kilaha, ‘Kota Mkulu Nguluwi vyoyalingikala!’
16Waisilaeli wana nhumbula zigagadale,
kota libwa liwele na chijeni.
Ndaze lelo Mkulu Nguluwi yawadime,
kota ming'holo kuli honhu hagazi ha kudila migongolo?
17Wanhu wa Isilaeli nawelumba na jimalukolo.
Waleche walutilile!
18Kota vila chilundo cha wagalile,
wangulutilila na ung'hondwa wa hewo,
vilongozi wa hewo wanguganaga ng'hatu soni.
19Lelo, chivuluvumbi chowawembelusa,
wozonela soni nhambiko za hewo kwa milungu ja udesi.