Waisilaeli wangutagusigwa
1“Mhulichize hemwe watambika,
muwiche goya makutu, hemwe Waisilaeli!
Mhulichize, hemwe ivyazi lya mndewa,
namuwa idiwa kwa wanhu wa Misipa,
namuwa utandawala wa kuwagwiliza wanhu wa Taboli,
ahyo, motagusigwa kwa kuwalongoza wanhu leka wawe kutali na Nguluwi.
2Walingubelenhuka nawonjeza lukami kukopola.
Nani ndowagaza weng'ha.
3Ndangugazela geng'ha kuwala wanhu wa Isilaeli,
hawevisile hali heni.
Hemwe wanhu wa Isilaeli namdita ung'hondwa,
hemwe mweng'ha namkokomoka.
Hoseya kanguwakanya wanhu kuwala kujifugamila milungu
4“Madito ga hewo ganguwalemeza kumhiluchila Nguluwi wa hewo.
Mnhumbula za hewo nammema ung'hondwa,
hawalingumhulichiza Mkulu Nguluwi.
5Kidaya kwa Isilaeli kwangoneka hazelu,
wanhu wa Isilaeli wochikwang'hwala hali nongwa ya hewo,
wanhu wa Yuda nawo wochikwang'hwala hamwe na hewo.
6Mhela howoluta na vilundo vya hewo
vya ming'holo na misenga,
kumpala Mkulu Nguluwi,
hawoweza kumona,
kwa vila nakebagula na hewo.
7Hawawele wa kukundigwa hali Mkulu Nguluwi,
nawali na wana kulawa kwa wadala wanji.
Lelo, mnvina za hewo za kulawa kwa nyelezi zowadumya,
hamwe na migunda ja hewo.
Wanhu wa Yuda na wa Isilaeli wangitowa
8“Mpembe mhalamhanda ya ngondo ako Gibeya,
mpembe talumbeta ako Lama.
Mlandule lizi lya nyhemo ako Beti-aveni.
Hemwe wanhu wa Benjamini,
mng'honyo wa hemwe ka kumbele.
9Zuwa lya magazo,
Isilaeli yowa kota kugunuche!
Chondiwikula hamba hali nhanzi za Isilaeli,
ndikomya, ndo mbuli ilinguya kulawila.
10Vilongozi wa Yuda nawali kota walinguhejeza maganga ga mbaka.
Ndobohola ng'halazi ya heni mchanya mwa hewo,
kota mazi tendema.
11Wanhu wa Isilaeli nawagazigwa, utaguso nauwakolela,
kwa vila nawanuwila kuwinza upoka wa kufugamila jimalukolo.
12Ahyo, heni Nguluwi nda kota fukuzi kwa wanhu wa Isilaeli,
kota chilonda chihile kwa wanhu wa Yuda.
13Wanhu wa Isilaeli lowauzelele utamwa wa hewo,
ena, wanhu wa Yuda lowachizelele chilonda cha hewo,
wanhu wa Isilaeli nawaluta Ashulu,
kulanda utanzi kwa mndewa mkulu,
ila heye hawezile kusa utamwa wa hewo,
hawezile kuchidita chilonda cha hewo chipone.
14Kwa vila ndowa kota isimba kwa wanhu wa Isilaeli,
kota isimba hali wanhu wa Yuda.
Ndowadadula vihande vihande na kuka,
ndowahola na haduhu yawele yowalohola.
15Ndohiluka hali honhu ha heni na kibagula na hewo
mbaka howoikunda nongwa ya hewo na kupala kumeho kwa heni.
Magazo ga hewo gowatagusa leka wamhale kwa kikangaza.”