1“chila mhela longanile kuwalohola Waisilaeli,
wihe wa wanhu wa Isilaeli nawali ugubuligwa,
madito gehile ga Samaliya nagali golawila.
Wangudita uhadi,
wahizi wangubena ng'handa,
wabokaji wanguvaba mnzila.
2Hawalingijesa ne hado kota heni,
ndangukumbuchila gehile ga hewo geng'ha.
Lelo madito ga hewo gehile nagawazunguluta banzi zeng'ha,
geng'ha gowaditile ga kumwando kwa heni.
3“Wangumdita mndewa yasangalale kwa wihe wa hewo,
wanguwadita vilongozi wasangalale kwa udesi wa hewo.
4Weng'ha ndo wang'hondwa,
hewo wana maya kota itanulu liwichigwe chiluli
chiwele yalingubanika mibumunda halinguganigwa kuchibwina,
kulawa hala hoyatijile utimbo
mbaka hala ibumunda holiwa goya kwa kubanichigwa.
5Kuli mnvina ya mndewa,
nawawadita vilongozi wa hewo wagale ng'hatu mbaka wadeche,
naye mndewa nakehanza hamwe na walingudita idaba.
6Kota itanulu vyolilingwaka,
nhumbula za hewo zangwaka kwa maya,
nechilo yeng'ha ng'halazi yangulavya iyosi,
hoifika mitondo, yangwaka kota milapi ja chiluli.
7Weng'ha wana ng'halazi kota itanulu lilingwaka
wanguwadumya vilongozi wa hewo.
Wandewa wa hewo weng'ha nawagwa,
haduhu ne yumwe hali hewo yalingundanda utanzi.”
Wanhu wa Isilaeli wangitumbila kwa wanhu wa isi zinji
8Nguluwi kangulutilila kulonga,
“Wanhu wa Isilaeli wangihanza na wanhu wa isi zinji,
wangoneka kota ibumunda liwele halipile.
9Wajenzi wanguhola mong'ho wa hewo,
ila hewo hawavizelele,
mbuliza nazenela kumutwi kwa hewo,
ila hewo wahela mbuli yoneche.
10Kidaya kwa wanhu wa Isilaeli kwangilajila hali hewo,
hanga aga geng'ha gangulawila,
ila hawangalamchile heni Mkulu Nguluwi, Nguluwi wa hewo, ne kumhala.
11Wanhu wa Isilaeli ndo kota ng'hunda,
wanguhadigwa chiubewe na wahela nyhala,
mhela umwenga wanguchema Misili,
mhela wunji wangugaluchila Ashulu.
12Mhela howoluta, ndotoza utandawala wa heni mchanya mwa hewo,
ndowakwega leka wagwe kota videje.
Hondihulika mbuli kota naweting'hana, ndowagwiliza.
13Wochona, kwa vila nawajilila.
Kudumigwa kuwafiche, kwa vila nawambelenhuka heni.
Nangana kuwagombola, ila wangulonga udesi kwa heni.
14Hawandilile kulawa mnhumbula za hewo,
ila wangulombocheza kuli vinhanda vya hewo.
Wangidumulaga kwa chiwalo cha kumfugamila Baali, leka wapate nyhule na divai inyale,
ila wanguhinduchila kutali na heni.
15Hanga nandiwalangusa na kuwapa mong'ho,
ila wangunuwila kudita gehile hali heni.
16Hawalingungalamchila Heni Mbele Kuchanya Ng'hatu,
wa kota upinde ulihela mong'ho.
Vilongozi wa hewo wobagama kwa ipanga,
kwa chiwalo cha ulonzi wa hewo wa ng'halazi.
Ahyo, wobezigwa kuli isi ya Misili.