Nongwa ng'hulu za isi ya Isilaeli za kujifugamila jimalukolo
1“Mpembe mhalamhanda!
Mng'honyo kanguya kota ikungule,
kuivaba ng'handa ya Mkulu Nguluwi,
kwa vila nawalibena ilagano lya heni
na kulibelenhuka ilajizo lya heni.
2Waisilaeli wangundilila wolonga,
‘Gwa Nguluwi wa hetwe, twangukuzela.’
3Ila wanhu wa Isilaeli nawazibeza mbuli zinojile,
ahyo, wang'honyo wowawinza.
4“Nawewichila wandewa ne kukundigwa na heni,
nawehagulila vilongozi ne heni kuwalonjela.
Kwa sendi za hewo na zahabu za hewo, nawegongomanyila limalukolo
mbuli iwele yowadumya hewo wawo.
5Hemwe wanhu wa Samaliya, mtoze kutali limalukolo lya hemwe lya ilogota.
Ng'halazi ya heni yangwaka kwa hemwe.
Nili mowa mlihela nongwa?
6Namwe Waisilaeli hihyo du!
Alyo limalukolo lya hemwe naligongomanyigwa na munhu hela,
haliwele Nguluwi.
Ena! Limalukolo lya ilogota lya Samaliya lyobenangwa!
7“Walingunyala mbeho, wobeta chivuluvumbi!
Mizuchila ja hewo ja nyhule jiwele kuli migunda
hajiweza kulela nyhule yoneche.
Wone jolela, mbeta azo wolya wajenzi.
8Waisilaeli nawamelwa,
lelo wa hali wanhu wa isi zinji,
kota chinhu chisowile utanzi,
9kwa vila nawaluta Ashulu kulanda utanzi,
kota idogowi lya kisolo lilingulubaluba liliyeka.
Wanhu wa Isilaeli nawalipa sendi kwa wamizi wa Ashulu, leka kuwamila hewo.
10Hanga nawagula utanzi kwa wanhu wa isi zinji,
ila ndowakungajiza.
Wowa ng'hochele kwa kutunyigwa na mndewa yawele na mong'ho.
11“Hanga wanhu wa Isilaeli nawezenjela honhu ha kulavila nhambiko kwa winji, kwa chiwalo cha nhambiko za gehile,
honhu aho ha kulavila nhambiko, nahawa honhu ha kuditila gehile.
12Nanyandika mbuli nyinji kwa chiwalo cha hewo,
kuwala malajizo ga heni, ila nawazona kota chinhu chijenzi.
13Wangulavya nhambiko,
na kulya miwunde jake,
ila heni Mkulu Nguluwi hambe nojezwe nawo.
Ndangukumbuchila gehile ga hewo,
ndowagaza kwa gehile ga hewo,
ndowahilusa kuli upogozi kula Misili.
14Waisilaeli nawamsemwa Yawalumbile,
nawezenjela ng'handa za sendi nyinji ng'hatu,
wanhu wa Yuda nawajizenjela ngome miji minji,
ila ndohilika chiluli kuli miji ajo,
na kuzilakaza ngome za hewo.”