Magazo kwa chiwalo cha gehile ga wanhu wa Isilaeli
1Mleche kusangalala hemwe Waisilaeli!
Mleche kudita mnvina kota wanhu wa isi zinji,
kwa vila namuwa wang'hondwa kwa kumleka Nguluwi wa hemwe.
Namgana kupegwa sendi kwa chiwalo cha ung'hondwa,
chila honhu ha kupululila nyhule.
2Honhu ha kupululila nyhule na honhu ha kukamila divai haviweza kuwadita wanhu wegute,
hampata divai inyale.
3Hawochikala kuli isi ya Mkulu Nguluwi,
ena, wanhu wa Isilaeli wohiluka kuli upogozi ako Misili,
wolya chilyo chikokomoche ako Ashulu.
4Hawomlavila Mkulu Nguluwi nhambiko ya divai,
ne nhambiko za hewo haziweza kumnojeza.
Chilyo cha hewo chowa kota chilyo cha matanga,
weng'ha wawele wolya chilyo acho, wowa wakokomoche.
Chowa chilyo cha kuwadita wegute hela,
hachiwa chinhu cha kuchigala kuli Ng'handa ya Mkulu Nguluwi.
5Modita choni kuli zila mnvina ziwichigwe,
kuli mnvina za Mkulu Nguluwi? Hamuweza.
6Hombilima kudumigwa kwa isi ya hemwe,
Misili yowabochela,
ila vilaga vya hemwe vyanguwabeteza ako Memfisi.
Misolo johola honhu ha ng'hano za sendi,
miwa jomema kuli mihema ja hemwe.
7Mazuwa ga magazo nagoya,
ena, mazuwa ga kuhilula chibida nagafika,
Waisilaeli wanguganigwa wauzele mhela awo!
Hemwe mwangulonga, “Mloli ka mpoka,
yalingulongozwa na muhe kana lukwale.”
Mwangulonga ahyo kwa chiwalo cha winji wa gehile ga hemwe,
kwa vila namumzudila heye.
8Mloli ka mwamizi wa wanhu wa Isilaeli honhu ha Nguluwi,
ila honeche hoyalinguluta kanguwichilwa idiwa kota chideje na yalingupelemba.
Mbaka kuli ng'handa ya Nguluwi wa heye kanguzudilwa.
9Hemwe namwinjila kuli wihe,
kota vyoiwele kula Gibeya.
Nguluwi kozikumbuchila nongwa za hemwe,
na kuwagaza kwa chiwalo cha gehile ga hemwe.
10“Hondiwapatile Waisilaeli, nawali kota kupata zabibu kuchiwala.
Londiwawene wasekulu wa hemwe, nayali goya kota mafuza ga mwaluko kuli igodi lya mtini.
Ila hala howafichile ako Baali-peoli, nawalifugamila lila limalukolo lya Baali,
nawawa izudizo kota acho chowachiganile.
11Ukulu wa Isilaeli woguluka kota chideje,
wana hawopondigwa kahi,
ne kuwa na himila.
12Hanga wowalolela wana, ndomkopola chila yumwe wa hewo.
Wochona hewo hondiwaleka waliyeka!
13Kota vyombonile aho mwaluko,
Isilaeli nayali kota igodi lideche lya Tilo kuli ibindi linojile,
ila lelo Isilaeli yomlapa kuwahilika wana wa hewo wakopoligwe.”
14Uwagaze wanhu awa gwa Mkulu Nguluwi!
Ila kowagaza ndaze?
Uwadite wache wawo wawe mhende,
uwadite wawe walihela matombo ga konyeza wana wa hewo.
15Mkulu Nguluwi kangulonga hino,
“Wihe wa hewo weng'ha nawaluchila Giligali,
ako ndo nyaluche kuwazudila.
Kwa chiwalo cha wihe wa madito ga hewo,
ndowawinga haluga hangu.
Siwagana kahi.
Vilongozi wa hewo weng'ha ndo walingubelenhuka.
16Wanhu wa Isilaeli nawatowigwa,
nawali kota igodi liwele na mizabi jikalile,
hawoponda wana.
Wone woponda, ndowakopola wana wa hewo wawaganile.”
17Nguluwi nakawalema, kwa vila hawamhulichize,
wowa wanhu wa kulubaluba, hali wanhu wa isi zinji.