Musa kogatambikila makabila ga Izilaeli
1Zino azo mbuli za kutambikila ziyalongile Musa, munhu wa Imulungu, kawalongela wanhu wa Izilaeli yang'hali hanakufa.
2“Mndewa Imulungu keza kulawa kulugongo lwa Sinai,
katulawila kulawa kulugongo lwa Seili,
katumwemwesela kulawa kulugongo lwa Palani.
Kalawa hagati ya wasenga elufu kumi wa kuulanga,
na moto ukwaka mumkono wake wa ukudila.
3Mndewa Imulungu kawanogela wanhu zake,
na kowakaliza wanhu zake wang'alile.
Avo wakweleleza lwayo lwake,
na wagoga gayawalongele.
4Musa katulagiza tugagoge malagizo,
mbuli ino ayo ngama yetu.
5Mndewa Imulungu kawa Mndewa wa Izilaeli,
kipindi vilongozi wao viwaiting'hane,
na makabila gose vigaiting'hane.”
6Musa kalonga mbuli ya kabila da Lubeni,
“Lubeni yawe mgima na wala sikuyafe,
hamoja wanhu wake okuwa wadodo.”
7Kwa kabila da Yuda kalonga,
“Go Mndewa Imulungu utegeleze kililo cha kabila da Yuda,
umbweze kabili kwa ndugu zake.
Mgombele kwa makono gako mbuli yake,
uditaze kabila da Yuda mbuli ya awo omwihila.”
8Kwa kabila da Lawi kalonga,
“Go Mndewa Imulungu uwalongele wanhu wa kabila da Lawi gaja goulonda kwa mabwe33:8 Kwa Kiebulania gago gamabwe gokemigwa Ulimu na Tumimu. ga kujuwa gaja goulonda,
awo wauwagezile ako Masa,
na kugomba nao ako Meliba.
9Walawi wawaleka tata zao na mama zao,
wawasemwa ndugu zao,
hawawajuwile hata wanao kwavija wagagoga malagizo gako,
na wagoga lagano jako.
10Na owafunza wana wa Yakobo mafundizo gako,
owafunza wanhu wa Izilaeli malagizo gako.
Walawi osoma ubani mgameso gako,
na nhosa za kusoma moto uchanha ya upango wako wa nhosa.
11Go Mndewa Imulungu uwatende wamwede kwa nguvu zao,
utogole sang'hano za makono gao, ubene nguvu za awo owehila,
na uwatende sikuwenuke kabili.”
12Kwa kabila da Benjamini kalonga,
“Dino dijo kabila diyodinogela Mndewa Imulungu na kodikaliza,
kowakaliza imisi yose,
na kokala mvigongo vake.”
13Kwa kabila da Yusufu kalonga,
“Mndewa Imulungu na yaitende imwede isi yake,
yaitende imwede kwa mvula kulawa kuulanga,
na mbwibwi kulawa hasi ya isi,
14yaitende imwede kwa matunda gepile goya kwa zuwa,
matunda goleligwa kila msimu,
15kwa ndiya inogile na ndiya nyingi ya vigongo va umwaka.
16Isi yake imeme ganogile gose,
imwede kwa ganogile golawa kwa Mndewa Imulungu,
yalawile mkisolo kikwaka.
Kumweda kuko kuwavikile wanhu wa kabila da Yusufu,
yakalile mkulu hagati ya ndugu zake.
17Ukulu wake kamba ukulu wa ng'ombe mbigalo wa ichanduso,
mhembe zake kamba mhembe za nyati mbigalo.
Kozitumia kuwasung'ha wanhu wa isi ziyagwe,
kowasung'ha mbaka kuuhelelo wa isi.
Efulaimu kokuwa na wakalizi wa ng'hondo maelufu mengi,
na Manase kokuwa na wakalizi wa ng'hondo maelufu.”
18Kwa kabila da Zabuloni na kabila da Isakali kalonga,
“Zabuloni deng'helela mmwanza wako,
na gweye Isakali deng'helela mvibanda vako.
19Owagoneka wageni mvigongo vao,
na kuko wanhu olava nhosa zilondigwa.
Kwavija awo opata utajili kulawa mbahali,
na okuwa na ngama mumsanga wa mwhani.”
20Kwa kabila da Gadi kalonga,
“Yagweleligwe ukulu Imulungu yomgwelela Gadi isi ng'hulu.
Gadi kokala kamba simba,
yopalula mkono na pala.
21Kosagula isi inogile,
isi inogile ya kilongozi kekiligwa heyo.
Wahaiting'hana iwakulu wa iwanhu,
heyo kogoga gose goyolonda Mndewa Imulungu kwa kuwatagusa goya Waizilaeli.”
22Kwa kabila da Dani kalonga,
“Dani kamba mwana simba,
yozumha kulawa Bashani.”
23Kwa kabila da Nafutali kalonga,
“Nafutali kumema bazi dilawa kwa Mndewa Imulungu,
kumema ganogile golawa kwa Imulungu,
isi yako ya kusini na kudihongela zuwa.”
24Kwa kabila da Asheli kalonga,
“Asheli yamwede kubanza wana wose wa Yakobo,
ndugu zako wose wakunogele,
na yavabike mgulu wake mna gamavuta ga mizeituni.
25Mabuga gako gakalizigwe kwa nyivi za mizuma na shaba ya kiguzi,
na siku zose ugangamale!”
26Gweye Izilaeli haduhu kamba Imulungu wako,
heyo kabita kuulanga keza kukutaza,
kabita uchanha kuna uukulu wake.
27Imulungu wa milele heyo wakumkimbilila mweye,
kawapapa mmakono gake milele.
Kawawinga wanhu owehila mgameso genu,
kawalagiza, “Wabanangeni.”
28Avo wanhu wa Izilaeli wakala goya,
wanage Yakobo waiyeka,
mna iisi imemile ndiya na divai,
na ulanga wake olagaza kungugu.
29Mmweda mweye Waizilaeli.
Nani kamba mweye,
mweye mukomboligwe na Mndewa Imulungu,
heyo yeli ngao yenu,
na sime diwatenda muhume.
Wanhu owehila okwiza kuno onyawanyawa mgameso genu,
na mweye mowabojoga.