Imulungu kowasagula Walawi wawataze walava nhosa
1Uno awo ulelo wa Haluni na Musa kipindi Mndewa Imulungu viyalongile na Musa ako kulugongo lwa Sinai. 2Haluni kakala na wana wane na hewo wakala Nadabu imwana chaudele na Abihu na Eleazali na Itamali. 3Wano wose wagidiligwa mavuta wawe walava nhosa. 4Lakini Nadabu na Abihu wafa kuulongozi wa Mndewa Imulungu viwakalile omulavila Imulungu moto haulondigwe ako kuluwala lwa Sinai. Awo wakala hawalelile wana, avo Eleazali na Itamali wasang'hana kamba walava nhosa kipindi tatao viyakalile mgima.
5Mndewa Imulungu kamulongela Musa, 6“Wagale behi wanhu wa kabila da Lawi na uweke kuulongozi wa mulava nhosa Haluni ili wamsang'hanile heyo. 7Wasang'hane hanhu hake na hanhu ha Waizilaeli wose mna dihema da mting'hano. 8Wavilole goya viya vose va dihema da mting'hano na wawataze Waizilaeli kusang'hana hanhu hang'alile. 9Gweye umgwelele Haluni na wanage awo iwalawi wawe hamoja nao, hewo walavigwa hagati ya Waizilaeli wawasang'hanile hewo. 10Abaho msagule Haluni na wanage wasang'hane kamba walava nhosa, lakini munhu yoyose iyagwe yonda yasang'hane sang'hano ayo yakomigwe.”
11Mndewa Imulungu kamulongela Musa, 12“Lola niye niwasagula Walawi na niwalava hagati ya Waizilaeli wose hanhu ha kila mwana chaudele wa kimbigalo wa Waizilaeli, avo Walawi wose wangu niye, 13kwavija kila mwana chaudele wa munhu na wa mnyama ni wangu. Kipindi viniwakomile wana chaudele wa Wamisili nimsola kila mwana chaudele wa Izilaeli, kila mwana chaudele wa munhu na vivija wa mnyama, wose okuwa wangu. Niye ayo Mndewa Imulungu.”
Walawi opetigwa
14Musa viyakalile kuluwala lwa Sinai Mndewa Imulungu kamulongela, 15“Wapete Walawi wose kamba viweli muulelo wao na lukolo lwao, kila mbigalo kusongela wana ving'hele weli na mwezi umoja na kugendelela.” 16Avo Musa kawapeta kamba Mndewa Imulungu, viyamulagize. 17Wanage Lawi wakala,
Gelishoni na Kohati na Melali.
18Gano gago matwaga ga wana wa Gelishoni kamba vizili ng'holo zao, Libini na Shimei.
19Gano gago matwaga ga wana wa Kohati kamba vizili ng'holo zao, Amulamu na Ishali na Hebuloni na Uzieli.
20Gano gago matwaga ga wana wa Melali kamba vizili ng'holo zao, Mahili na Mushi.
Uno awo ulelo wa Walawi kamba viweli mzing'holo zao.
21Ng'holo za Walibini na Washimei zilawa kwa Gelishoni. 22Wambigalo wose wapetigwe kusongela wana ving'hele weli na mwezi umoja na kugendelela wakala elufu saba na magana tano (7,500). 23Ulelo uno wa Gelishoni, walondigwa kwika ng'hambi yao mwambu wa kudihongela zuwa, kumzingo wa dihema da mting'hano. 24Nayo Eliasafu mwanage Laeli kokuwa kilongozi wa ulelo wa Gelishoni. 25Sang'hano ya ulelo wa Gelishoni ikala kudilola goya dihema da mting'hano, hamoja na ingubiko ya dihema na panziya da ulwivi lwa dihema, 26mapanziya ga uluwa uzunguluke dihema na upango wa nhosa na panziya da ulwivi lwa uluwa na nzabi zake. Sang'hano ayo yose ikala yao.
27Ng'holo za Waamulami na Waishali na Wahebuloni na Wauzieli zilawa kwa Kohati. 28Iwambigalo wose kwa wose kusongela wana ving'hele weli na mwezi umoja na kugendelela wakala elufu nane na magana sita (8,600). Hewo sang'hano yao ikala kuvilola goya vinhu vili mna ihanhu hong'ala. 29Ulelo wa Kohati walondigwa weke ng'hambi yao mwambu wa kusini wa dihema da mting'hano, 30nayo Elisafani mwanage Uzieli kakala kilongozi wa ulelo wa Kohati. 31Hewo sang'hano yao ikala kudilola goya sanduku da lagano, na imeza na ikingolobweda cha kwikila taa, zimhango za nhosa na viya visang'hanilwa hanhu hong'ala na dipanziya da hanhu hong'ala ng'hani, sang'hano za vinhu avo vose ikala yao.
32Nayo Eleazali mwanage mulava nhosa mkulu Haluni katendigwa yawe kilongozi wa iwakulu wa Walawi, na iwasang'hanaji wose wa hanhu hong'ala.
33Ng'holo za Wamahili na Wamushi zilawa kwa Melali. 34Uno awo ulelo wa Melali. Wambigalo wose wapetigwe kusongela wana ving'hele weli na mwezi umoja na kugendelela wakala elufu sita na magana mbili (6,200). 35Kilongozi wa ulelo wa Melali kakala Sulieli mwanage Abihaili, awo olondigwa weke ng'hambi yao mwambu wa kasikazini wa dihema da mting'hano. 36Hewo sang'hano yao ikala kulola mbao za dihema da mting'hano na fito zake na zimhanda na vikalilo vake na vinhu vose va kugogeleza dihema, sang'hano ya vinhu avo vose ikala yao. 37Vivija walondigwa kuzilola zimhanda za uluwa, na vikalilo vake na vifungilo vake na nzabi zake.
38Musa na Haluni na wanao weka ng'hambi yao mwambu wa kudilawilila zuwa kuulongozi wa dihema da mting'hano, hewo sang'hano yao ikala kulava nhosa na kulola goya hanhu hong'ala na kusang'hana hanhu aho mbuli ya kinhu chochose kilondigwe kwa Waizilaeli. Munhu yoyose iyagwe yahakwesa behi yakomigwe. 39Walawi wose kamba viweli muulelo wao, wambigalo wose kusongela wana ving'hele weli na mwezi umoja na kugendelela, awo wapetigwe na Musa na Haluni kamba viwalagizwe na Mndewa Imulungu wakala elufu ishilini na mbili (22,000).
Wana chaudele ogomboligwa
40Abaho Mndewa Imulungu kamulongela Musa, “Uwapete chaudele wose wa kimbigalo wa Waizilaeli kusongela wana ving'hele weli na mwezi umoja na kugendelela. 41Vivija uwabagule Walawi mbuli yangu niye Mndewa Imulungu hanhu ha iwana wa chaudele wa iwanhu wa Izilaeli, na vivija ubagule fugo zose za Walawi kamba hanhu ha fugo za chaudele za wanhu wa Izilaeli.”
42Avo Musa kawapeta wana wose chaudele wa Waizilaeli, kamba Mndewa Imulungu viyamulagize. 43Wana chaudele wose wa kimbigalo kamba matwaga gao vigeli, kusongela wana ving'hele wa mwezi umoja na kugendelela, wakala elufu ishilini na mbili na magana mbili na sabini na ndatu (22,273).
44Abaho Mndewa Imulungu kamulongela Musa, 45“Sambi wabagule Walawi wose wawe wangu hanhu ha wana chaudele wa Waizilaeli. Vivija ubagule fugo ya Walawi wose kamba hanhu ha wana chaudele wa fugo ya Waizilaeli, niye ayo Mndewa Imulungu. 46Mbuli ya kuwagombolela wana chaudele wa kimbigalo wa Waizilaeli magana mbili sabini na ndatu (273), wabanzile iwambigalo wose wa Walawi, 47avo kulawa kwa kila imoja wa awo wabanzile usole vihande vitano va shaba kamba viwopima hanhu hong'ala, 48na sente azo za kuwagombolela awo wabanzile umgwee Haluni na wanage.”
49Avo Musa katogola kuzisola sente azo za kuwagombolela awo wabanzile Walawi, awo waswelile kugomboligwa. 50Avo kavibokela kulawa kwa awo iwana chaudele wa Waizilaeli vihande va shaba elufu moja magana ndatu sitini na tano, kamba viwopima hanhu hong'ala, 51kawagwaa Haluni na wanage zisente azo, kamba Mndewa Imulungu viyamulagize.