1Wone yalingukanyigwa chila mhela, ila kangulutilila kuwa na nhumbula igagadale,
kodumigwa baho du, howeza kupona.
2Wone watanganiche walongoze, wanhu wangusangalalaga,
ila wone wehile walongoze, wanhu wangung'ung'utaga.
3Yalingugana luhala kangumdita mhaza wa heye yasangalale,
ila yalinguwa hamwe na mng'hondwa kanguwifyaga lufufu lwa heye.
4Wone mndewa yatumiye hachi, kanguipaga isi kwima nzinzili,
ila wone yagane kubochela chinhu kwa uviso, isi yangudumigwa.
5Yalingumhembuliza munhu yowalingikalasa habehi kwa udesi,
kanguwika idiwa lya kigwiliza yuye.
6Mwihe kangugwilizwaga kwa gehile ga heye,
ila yatanganiche kangwimbaga na kusangalala.
7Yatanganiche kanguzizela hachi za mzunwa,
ila mwihe hazizelele mbuli azo.
8Yalingubeza kangwambuzaga kilewa kuli muji weng'ha,
ila yawele na luhala kangukuditaga kilewa kusindamale.
9Wone yawele na luhala yetwanze na mpoka,
mpoka kanguwaga na ng'halazi ng'hatu na kuseka ne kinyamalila.
10Walingugana kubohola danda, wangumzudilaga yalihela nongwa,
mbaka wanhu wanojile wanguzudilaga kikala kwa heye.
11Mpoka kangulajilaga ng'halazi ya heye ne uviso,
ila yawele na luhala kangilemezaga na kuidita isindamale.
12Wone mndewa yahulichize mbuli za udesi,
wang'hangala wa heye weng'ha wowa na wihe.
13Mzunwa na yalingubunza wangiwhana kwa chinhu chimwe,
weng'ha weli nawapegwa meho na Mkulu Nguluwi.
14Mndewa yalinguwamulila wazunwa kwa hachi,
kowona ulongozi wa heye wangwima nzinzili mazuwa gose.
15Kuzapigwa na kukanyigwa, vyangigalaga luhala,
ila wone mwana kolechigwa yadite vyoyogana, kombasa soni mayake.
16Wone wehile walongoze, gehile gangonjezekaga,
ila watanganiche wolola kugwa kwa hewo.
17Umkanye mwanago, naye hokudita uwe na lunhwinhwi,
koisangalaza nhumbula ya hegwe.
18Wone hawe haduhu ulotezi wa chiuloli, wanhu wanguwaga walihela kuhulichiza,
ila nakatambichizwa munhu yula yalingubatilila malajizo.
19Mpogozi hambe yakanyigwe kwa ulonzi hela,
kwa vila ulonzi kanguuzela heye, hogana kuuhulichiza.
20Kwangumona munhu yalingulonga ne kijesa?
Fola mpoka kusinda heye.
21Yalingumhembuliza ng'hatu mpogozi wa heye kulawa uwana,
hamba mpogozi ayo komtunya kuli kuduma.
22Yazudile kangwambuzaga kilewa,
yalinguzudila himahima kangwambuzaga gehile menji.
23Kidaya kwa munhu kwangumdulisaga yuye,
ila yalingunyenyetela kopegwa lutogo.
24Yalinguwa hamwe na mhizi kangiwifya yuye,
kanguuhulikaga uhadi wa yula mhizi, ne kulonga chinhu.
25Kuwadumba wanhu ndo kiwichila idiwa gwegwe,
ila yalingitumbila kwa Mkulu Nguluwi ka hali kikala goya.
26Wenji wanguganaga kiwika habehi na mndewa,
ila munhu kangupegwa hachi ya heye kulawa kwa Mkulu Nguluwi.
27Yalihela hachi ndo izudizo kwa yagoloche,
naye yagoloche ndo izudizo kwa mwihe.