Xanunteya sɛnbɛ gbo
Ginɛ xa masenyi xɛmɛ bɛ
1«Xa i findixi n taara xɛmɛma nan na nu,
n nga xiɲɛ fixi naxan ma,
n nu nɔma i masunbude mixi ya xɔri n mu yaagima na ra.
2N nu nɔma i xaninde n nga yire,
i xa findi n karamɔxɔ ra,
n fa wɛni fanyi nun mangoe ye so i yi ra.»
Ginɛ xa masenyi ginɛdimɛe bɛ
3«N xunyi na n xanuntenyi bɛlɛxɛ,
a na n mafurukufe a yirefanyi ra.
4Darisalamu ginɛdimɛe, n bara wo mayandi,
wo naxa xanunteya raxunu, wo naxa a rakeli,
beenu a wama a xɔn ma tɛmui naxɛ.»
Ginɛdimɛe xa masenyi ginɛ xa fe ra
5«Nde na yi ginɛ ra naxan kelixi gbengberen yire,
a a xanuntenyi bɛlɛxɛ suxuxi?»
Ginɛ xa masenyi xɛmɛ bɛ
«N bara i raxunu mangoe bili bun ma,
i nga tɔɔrɔxi i baride dɛnnaxɛ.
6N xa findi i keren gbe ra,
alɔ i xa tɔnxuma naxan gbakuxi i kɔn ma,
xa na mu a ra naxan nasoxi i bɛlɛxɛsole ra,
barima xanunteya sɛnbɛ gbo dangife faxɛ ra.
N wama i xɔn n yɛtɛ bɛ,
alɔ aligiyama wama mixie xɔn ma ki naxɛ.
Xanunteya sɛnbɛ gbo alɔ tɛ,
Alatala naxan nadɛxɛxi, a mu xubenma.
7Baa ye mu nɔma xanunteya raxubende,
xure ye mu nɔma a bade.
Mixi naxan wama a harige birin masarafe xanunteya ra,
mixi na kanyi mayelema nɛ.»
Ginɛ taara xɛmɛmae xa masenyi
8«Xunya ginɛma na muxu yi ra,
a mu mɔxi sinden, a xiɲɛe xurun.
Muxu fama munse rabade a bɛ
mixi na a fen tɛmui naxɛ?
9Xa a luxi alɔ tɛtɛ naxan balanxi,
muxu a yɛnsɛma nɛ gbeti ra,
kɔnɔ xa a luxi alɔ naadɛ naxan nabixi,
muxu a balanma nɛ.»
Ginɛ xa masenyi xɛmɛ bɛ
10«N tan luxi nɛ alɔ tɛtɛ naxan mu rabima,
n xiɲɛe findixi yire makantaxie nan na.
Na kui n bara findi n xanuntenyi xa bɔɲɛsa ra.
11Wɛni sansi bili yire nu na Sulemani yi ra Bali Hamon.
A naxa a taxu a xa walikɛe ra,
naxee nu lanma e xa gbeti kɔbiri kole wulu fi na xa fe ra.
12N tan nan n ma wɛni bilie yire makantama.
I bara gbeti kole wulu sɔtɔ,
i xa walikɛe bara gbeti kole kɛmɛ firin sɔtɔ.»
Xɛmɛ xa masenyi ginɛ bɛ
13«I tan naxan na sansi yire,
i booree wama i xui ramɛfe,
kɔnɔ n tan nan na ramɛma.»
Ginɛ xa masenyi xɛmɛ bɛ
14«N xanuntenyi,
i xa i gi alɔ xeli,
i xa i gi alɔ tɔɔkɛ tefe ra geyae fari,
surayi ɲɔxunmɛ na dɛnnaxɛ.»