Kulanda utanzi kwa chiwalo cha kuwasumya wang'honyo
(Lwimbo. Zabuli ya Daudi.)
(Zabuli 57:7-11; 60:5-12)
1Gwa Nguluwi, nda nzinzili mnhumbula,
ndokwimba na kukutowela luchenze kwa nhumbula ya heni yeng'ha.
2Ndokwaluka kutowa ching'weleng'wele na igombogombo.
Ndolililimla isanya kuwe mitondo.
3Gwa Mkulu Nguluwi, ndolonga malumbo kwa hegwe hali wanhu wa isi,
ndokwimbila lutogo hali wanhu wa isi zeng'ha.
4Igano lya kwimilila lya hegwe ndo likulu mbaka kilanga,
kukundigwa kwa hegwe kwangwenela mbaka kuli ng'hungugu.
5Utogoligwe, gwa Nguluwi, kuchanya kilanga,
ukulu wa hegwe wenele muisi yeng'ha.
6Leka woulingugana waloholigwe,
ulohole kwa moko wa hegwe wa kudilo, unhyidichile.
7Nguluwi nakelaha kulawa helile ha heye,
“Lelo, hondisumya ndoigawanula Shekemu,
ibindi lya Sukoti ndolipima chila honhu.
8Gileadi ndo ya heni na Manase ndo ya heni,
Efulaimu ndo kofia ya heni ya chuma,
na Yuda ndo ng'hweku ya heni ya undewa.
9Moabu ndo kota chisaye cha heni cha kihovujila,
makwamba ga heni ndogatozela Edomu.
Ndotowa iyowe lya kusumya kwa chiwalo cha Filistiya.”
10Whaani yonyhilika kuli muji wa ngome?
Whaani yondongoza mbaka Edomu?
11Nakutuleka ng'hatu, gwa Nguluwi.
Lekachoni hambe ulute kahi na wamizi wa hetwe?
12Utugalile utanzi kwa chiwalo cha walingutugaza,
kwa vila ulohozi wa munhu hauwele chinhu.
13Kwa utanzi wa Nguluwi tosumya,
heye kowabiga walingutugaza.